काठमाडौँ । माओवादीले सार्वजनिक मञ्चमा पार्टी र नेतृत्वको आलोचना गर्न निषेध गरेको छ । सोमबार सकिएको स्थायी समिति बैठकले सार्बजनिक रुपमा पार्टी र नेतृत्वको आलोचना नगर्ने निर्णय गर्दै पार्टी निर्णयविपरीत नवोल्न नेता कार्यकर्तालाई सचेत गराएको छ । निर्णय बिपरित कुनै नेताले बोले कारबाहीको दायरामा ल्याउने चेतावनी पनि बैठकले दिएको छ ।
माओवादी उपमहासचिव जनार्दन शर्माले नेतृत्वविरुद्ध सार्वजनिक मञ्चबाटै टीकाटिप्पणी गर्दै आएको पृष्ठभूमिमा स्थायी समिति बैठकले पार्टी पद्धतिअनुसार मात्र धारणा राख्न नेताहरूलाई निर्देशन दिएको हो ।
स्थायी समितिले पार्टीभित्र गुट वा उपगुट बनाउने प्रवृत्तिलाई विधिसम्मत रूपमा नियन्त्रण गर्ने र त्यस्तो कार्यमा संलग्न व्यक्तिमाथि कारबाही प्रक्रिया अघि बढाउने निर्णय गरेको छ । नेताहरुले भने अध्यक्ष पुष्पकमल दाहाल र उपमहासचिव शर्माबीच देखिँदै आएको मतभेदलाई स्थायी समिति बैठकले मत्थर पारेको दाबी गरेका छन् । माओवादी उपाध्यक्ष एवं प्रवक्ता अग्निप्रसाद सापकोटाले स्थायी समिति बैठकबाट पार्टी एकताबद्ध भएको दाबी गरे ।
उपमहासचिव शर्माले सार्वजनिक मञ्चबाटै अध्यक्ष प्रचण्डको नेतृत्व र कार्यशैलीप्रति प्रश्न उठाउँदै आएका थिए । अध्यक्ष प्रचण्डले पनि उनको अभिव्यक्तिमाथि टिप्पणी गरेका थिए । स्थायी समिति बैठकमा ४६ मध्ये ४० नेताले पार्टी प्रणाली बाहिर गएर धारणा राखेको भन्दै शर्मालाई लिखित आत्मालोचना गर्न दबाब दिएका थिए । तर अध्यक्ष प्रचण्डले यसमा जोड गरेनन् । उपमहासचिव वर्षमान पुनले पनि सार्वजनिक रूपमा अभिव्यक्ति दिएबापत तुरुन्तै कारबाही गर्नुभन्दा आगामी दिनमा विधि बनाएर जानुपर्ने बताएका थिए ।
शर्माले अबदेखि पार्टीलाई एकताबद्ध बनाउने, विधि मानेर जाने बताएपछि त्यसलाई नै कमजोरी स्वीकारका रूपमा लिइएको एक पदाधिकारीले बताए ।
बैठकले नेत्रविक्रम चन्दले नेतृत्व गरेको नेपाल कम्युनिस्ट पार्टी (नेकपा) सँग एकता गर्ने निर्णय पनि गरेको छ । दाहाल र शर्माबीच पुस २०७८ देखि दूरी बढेको थियो ।
