Sajha Boli :: Nepal’s Reliable Digital Newspaper
वाग्मती सरकारमा एमालेबाट को को बन्दैछन् मन्त्री ?   

मकवानपुर । वाग्मती प्रदेश सरकार मन्त्रिपरिषद पुर्नगठन हुँदैछ । मुख्यमन्त्रीमा इन्द्रबहादुर बानियाँसँगै अन्य मन्त्रीहरुले मंगलवार सपथ लिँदैछन् । मुख्यमन्त्री बानियाँको नियुक्ति ३ बजे र शपथ ग्रहण ४ बजेका लागि तय गरिएको प्रदेश प्रमुख कार्यालय हेटौँडाले जनाएको छ । 

बानियाँसँगै नेकपा एमालेका तर्फबाट मन्त्रीले पनि आजै शपथ ग्रहण गर्ने छन् । एमालेका अधिकांश मन्त्रीहरू आजै नियुक्त भई शपथ लिने एक सांसदले जानकारी दिए । उनका अनुसार एमालेबाट यसअघिको सरकारमा समेत संलग्न एक जना मन्त्री भने पुनः दोहोरिने र अन्य ५ जना नयाँलाई अवसर दिएको छ ।  

एमालेले संसदीय दलको प्रमुख सचेतक मधुसूदन पौडेलको नेतृत्वमा सरकारमा सहभागिता जनाउँदै छ भने दोहोरिने मन्त्री स्वास्थ्य मन्त्रालयको जिम्मेवारी सम्हालेका किरण थापा मगर रहेका छन् ।

उनलाई पुनः स्वास्थ्य मन्त्रालयको जिम्मेवारी दिने तयारी रहेको छ भने जयराम थापालाई श्रम, रोजगार तथा यातायात मन्त्री, भरतबहादुर केसीलाई वन तथा वातावरण मन्त्री, मधुसूदन पौडेललाई कृषि तथा पशुपन्छी विकास मन्त्री, डा. दिनेशचन्द्र देवकोटालाई भौतिक पूर्वाधार विकास मन्त्री र बिन्दु श्रेष्ठलाई उद्योग, वाणिज्य, भूमि तथा प्रशासन मन्त्री बनाउने एमालेको तयारी छ ।

एमालेबाट मन्त्री व्यक्ति टुंगिएपनि मन्त्रालयको बारेमा भने फेरबदल हुन सक्ने बताईएको छ । 

प्रकाशित मिति: मंगलबार, साउन २०, २०८२  १०:३५
प्रतिक्रिया दिनुहोस्
Weather Update