चरिकोट । नेकपा एमाले दोलखाले पार्टी केन्द्रको पछिल्लो निर्णयलाई सर्बसम्मत रुपमा अनुमोदन गरेको छ । एमाले नेतृत्वमा आउने पुर्व राष्ट्रपति विद्यादेवी भण्डारीको घोषणासँगै कतिपय जिल्लाहरुमा गुटगत कार्यक्रमहरु भैरहेका बेला दोलखा एमाले पार्टी निर्णयको पक्षमा एकढिक्का भएर उभिएको हो ।
जिल्ला कमिटि बैठकको निर्णय सार्बजनिक गर्न बुधवार आयोजित पत्रकार सम्मेलनमा पोलिट व्यूरो सदस्य समेत रहेका एमाले दोलखा जिल्ला ईन्चार्ज पार्वत गुरुङले जिल्लाको सबै तहका पार्टी पंक्तिले केन्द्रको निर्णयलाई एकमतका साथ ऐक्यबद्धता जनाएको बताए । “अबको पार्टी महाधिवेशनको अध्यक्ष र २०८४ पछिको प्रधानमन्त्रीमा केपी ओलीको विकल्प छैन, उहाँ समयले माग गरेको नेता हो, उनले भने ।”
एमालेको तर्फबाट दुई दुई पटक राष्ट्रपति भैसकेको व्यक्ति मुलुककै अभिभावक र साझा व्यक्ति भएको भन्दै उनले पुर्बराष्ट्रपति भण्डारीले पार्टीको निर्णयलाई अस्वीकार गर्न नमिल्ने बताए ।
एमाले दोलखाको गत असार ७ गतेको बैठकले पार्टी विधानमा उमेरहद तथा कार्यकालको सिमा लगाउन नहुने र पुर्ब राष्ट्रपति भण्डारी राजनीतिमा फर्कन नहुने निर्णय गरेको थियो । पार्टी केन्द्रले समेत सोही अनुसार निर्णय गरेको भन्दै केन्द्रीय कमिटि प्रति धन्यवाद व्यक्त गरेको छ ।
बैठकले यही भदौ २० देखि २२ गतेसम्म आयोजित विधान महाधिवेशनमा प्रस्तुत हुने विधान मस्यौदालाई समर्थन जनाउँदै उमेरहद तथा कार्यकाल वन्देज खुला राख्नुपर्ने निष्कर्ष निकालेको छ । यस्तै जिल्ला कमिटि कार्यकारी हुने, समावेशी कमिटिहरु निर्माण गर्ने, पार्टी सदस्यहरु उत्पादनमा जोडिनुपर्ने, सम्पर्क मञ्च र भुगोलको सम्बन्ध सुधार गर्ने लगायतका निर्णय बैठकले गरेको जिल्ला अध्यक्ष नरबहादुर श्रेष्ठले जानकारी दिए ।
