काठमाडौं । रुस युक्रेन युद्ध अन्त्यको लागि अमेरिकी रास्ट्रपति डोनाल्ड ट्रम्प र रुसी रास्ट्रपति भ्लादीमिर पुटिनले दुई घण्टा वार्ता गरेका छन् । वार्ता प्रगतिउन्मुख भए पनि ठोस सम्झौता भने हुन सकेन । वार्तापछि ट्रम्प र पुटिन एकै मञ्चमा करिब १० मिनेट देखिएका थिए ।
दुवै नेताले वार्ताबारे सकारात्मक प्रतिक्रिया जनाएका छन् । पुटिनले आफू ‘सत्यनिष्ठ भएर’ युद्ध अन्त्य गर्न इच्छुक रहेको भन्दै युक्रेन र युरोपलाई वार्ता भंग नगर्न चेतावनी दिए । पुटिनले यो भेटवार्ता द्वन्द्व समाधानको सुरुआती बिन्दु मात्र रहेको प्रतिक्रिया दिए ।
पुटिनले ट्रम्पसँग व्यावसायिक सम्बन्धको रुपमा उल्लेख गर्दै २०२० को अमेरिकी निर्वाचनपछि आफू पदमा निरन्तर रहेको भए युद्ध सुरु नै नहुने ट्रम्पको भनाइप्रति सहमति जनाए । ट्रम्पले भने वार्तामा केही प्रगति भएको तर अपेक्षित लक्ष्यमा पुग्न नसकेको बताए ।
ट्रम्पले चाँडै नै युक्रेनी राष्ट्रपति भोलोदिमिर जेलेन्स्की र युरोपेली नेताहरूसँग टेलिफोन वार्ता गर्ने जानकारी दिएका छन् । अन्त्यमा ट्रम्पले पुटिनसँग फेरि चाँडै भेट्ने सम्भावना व्यक्त गरे भने पुटिनले ‘अर्को पटक मस्कोमा’ भेटौला भन्दै जवाफ दिए ।
