काठमाडौं । नेपालले पछिल्ला चार आर्थिक वर्षमा झन्डै ४९ अर्ब रूपैयाँको बिजुली निर्यात  गरेको छ । नेपालले ४८ अर्ब ८४ करोड रूपैयाँको बिजुली भारत र बंगलादेशलाई बेचेको हो। यस अवधिमा ६४ अर्ब ७४ करोड रूपैयाँको बिजुली आयात भएको छ । 

नेपालले सन् २०२१ नोभेम्बर (२०७८ कात्तिक १७) देखि भारतमा बिजुली निर्यात गर्न थालेको हो। पहिलो पटक ३९ मेगावाट बिजुली निर्यात गरिएको थियो। त्यसयता हरेक वर्ष निर्यात बढ्दै गएको छ।

हाल नेपालले भारतमा १०९०.९ मेगावाट बिजुली निर्यात गर्ने अनुमति पाएको छ। भारतसँगै नेपालले बंगलादेशमा पनि बिजुली निर्यात गरिरहेको छ। भारत र बंगलादेश गरी बर्खाको समय कुल ११३०.९ मेगावाट बिजुली नेपालले निर्यात गरिरहेको छ।

प्राधिकरणका अनुसार अघिल्लो वर्षको तुलनामा गत आर्थिक वर्ष बिजुली निर्यात बढेको छ। निर्यात गरिएको बिजुलीको औसतदर प्रतियुनिट ८ रूपैयाँ ७२ पैसा छ। नेपालको विद्युत जडित क्षमता ३६ सय मेगावाट नाघेको छ। 

नेपाल र भारतबीच १० वर्षमा १० हजार मेगावाट बिजुली निर्यात गर्ने गरी दीर्घकालीन विद्युत व्यापार सम्झौता भइसकेको छ।