काठमाडौँ । अमेरिकाले तयार पारको प्रतिवेदनले नेपालको मानव अधिकारमा सुधार नआएको देखाएको छ । अमेरिकाले बुधबार जारी गरेको ‘मानवअधिकार अभ्यासहरू–२०२४’ प्रतिवेदनमा यस्तो निष्कर्ष निकालिएको हो ।
नेपालमा गैरन्यायिक हत्या, यातना, मानव तस्करी, अमानवीय तथा अपमानजनक व्यवहार, अभिव्यक्ति र मिडिया स्वतन्त्रतामाथि हमलाका साथै पत्रकारहरूविरुद्ध हिंसा, धम्की र स्वेच्छाचारी गिरफ्तारी भएको प्रतिवेदनमा उल्ल्लेख छ । प्रतिवेदनमा नेपालको सञ्चारमाध्यममा भएका आक्रमणलाई पनि समेटिएको छ ।
अमेरिकी सरकारको प्रजातन्त्र, मानवअधिकार र श्रम विभागले जारी गरेको प्रतिवेदनमा नेपालमा अभिव्यक्ति स्वतन्त्रता र मिडिया स्वतन्त्रतामा गम्भीर प्रतिबन्ध, सञ्चारकर्मीहरूमाथि हिंसा, धम्की र अनुचित गिरफ्तारी भएको जनाइएको छ ।
सरकारले मानवअधिकार उल्लंघन गर्ने अधिकारीहरूमाथि अनुसन्धान गर्न कदम चाले पनि दोषी ठहरिएका अधिकारीहरूलाई सजाय दिलाउन नसकेको प्रतिवेदनको निष्कर्ष छ ।
