चरिकोट । दोलखाको ऐतिहाँसिक बिरासत बोकेको भीम माविका उत्कृष्ट विद्यार्थीलाई सम्मान गर्न अक्षयकोष स्थापना गरिएको छ । विद्यालयका सहायक प्रधानाध्यापक शेरबहादुर थापाले एक लाख रुपैयाँ बराबरको अक्षयकोष स्थापना गरेका हुन् ।

विद्यालयमा आयोजित एक कार्यक्रमकाबीच सहायक प्रअ थापाले हरेक वर्ष उत्कृष्ट हुने विद्यार्थीलाई सम्मानित गर्नेगरी द वेष्ट स्टुडेन्ट अफ दि इयर पुरस्कारका लागि उक्त अक्षयकोष घोषणा गरे ।

आफ्नी माता विष्णुमाया थापाको नाममा स्थापना गरिएको उक्त अक्षयकोषका लागि एक लाख रुपैयाँको चेक थापाले वडा अध्यक्ष स्टालिन श्रेष्ठ र विद्यालय व्यवस्थापन समितिकी अध्यक्ष ज्ञानु योगीलाई हस्तान्तरण गरे । चेक हस्तान्तरण गर्दै सहायक प्रअ थापाले उत्कृष्ट शैक्षिक नतिजा हाँसिल गर्न विद्यार्थीहरुलाई प्रोत्साहित गर्ने उदेश्यले आफुले अक्षयकोष स्थापना गरेको बताए । 

विव्यस अध्यक्ष ज्ञानु योगीको अध्यक्षतामा भएको कार्यक्रममा कार्यक्रममा समाजसेवी आत्माकृष्ण श्रेष्ठ, वडा अध्यक्ष स्टालिन श्रेष्ठ लगायतले मन्तव्य व्यक्त गरे ।