चरिकोट । शिक्षक सेवा आयोगका लागि वर्षेनी हजारौं शिक्षकहरु प्रतिस्पर्धा गर्छन् । गाउँघरदेखि सहरबजारसम्म शिक्षकहरुको छुट्टै आकर्षण छ । सरकारी तलब सुविधा, समाजमा मानसम्मानजस्ता कारणले शिक्षक बन्न चाहनेहरु धेरै हुन्छन् । तर पछिल्लो समय गाउँका विद्यालयलाई शिक्षक पाउन मुस्किल छ ।
दोलखामा पटक पटक विज्ञापन गर्दा पनि शिक्षक नपाउँदा सरोकारवाला चिन्तित छन् । जिरी नगरपालिका–९, स्थित कालिका माविले गणित शिक्षकको लागि एघारौं पटक विज्ञापन गर्नुपरेको छ । संघीय अनुदान अन्तर्गत करार सेवाका लागि सो विद्यालयले २०८१ सालको असोज महिनादेखि उक्त पदमा लगातार विज्ञापन खुलाईरहेको छ ।
शैलुङ गाउँपालिकाले पनि २ जना गणित विषय शिक्षकका लागि एघारौं पटक विज्ञापन गरेको छ । गाउँपालिका शिक्षक छनोट समितिका संयोजक संजिब न्यौपानेका अनुसार गाउँपालिकाले उक्त विषय शिक्षकका लागि एघारौं पटक सूचना प्रकाशित गरेको हो ।
यस्तै जिल्लाकै कालिञ्चोक गाउँपालिकाले पनि गणित शिक्षकका लागि बिहिवार पाचौं पटक सूचना प्रकाशित गरेको छ ।
जिल्ला स्थित अन्य विद्यालयहरुले पनि विज्ञापन गर्दा शिक्षक अभावको समस्या झेलिरहेका छन् ।
अनुदान कोटाको लागि तलब कम हुने र अरु सुविधा नहुने भएकाले शिक्षक पाउनै मुस्किल भएको सरोकारवाल बताउँछन् ।
माध्यमिक तहका शिक्षकले ४३ हजार ६८९ रुपैयाँ तलब, चाडबाड खर्च, पोशाक खर्च सुविधा पाउँछन् भने संघीय अनुदानमा राखिएका शिक्षकले ३५ हजार ९९० मात्रै तलब पाउँछन् । त्यस्तै पोशाक तथा चाडबाड खर्च पनि नपाउने भएकाले पनि अनुदान कोटामा आकर्षण नभएको बताईन्छ ।