चरिकोट । तामाकोशी नदी तटिय क्षेत्रमा आज सतर्कता अपनाउन आग्रह गरिएको छ । माथिल्लो तामाकोशी जलविद्युत आयोजनाको जलाशय सफा गर्ने क्रममा नदीमा पानीको सतह घटबढ हुने भएकोले सतर्कता अपनाउन आग्रह गरिएको हो ।

अपर तामाकोशी हाइड्रोपावर लिमिटेड आज एक दिन आयोजनाको उत्पादन बन्द गरेर जलाशय सफा गर्न लागेको हो ।  आज विहान ५ बजेदेखि राती ८ बजेसम्म जलविद्युत केन्द्रको जलाशय सफा गर्न गर्ने क्रममा तामाकोशी नदीमा पानीको सतह घटबढ हुने भएकोले सतर्क रहन तल्लो तटिय क्षेत्रका स्थानीयलाई आयोजनाले आग्रह गरेको छ ।

तामाकोशी नदी तटिय क्षेत्र लामाबगर, छेतछेत, गोंगर, जगत, टुनिटार, जामुने, भोर्ले, सिंगटी, नयाँ पुल, किर्ने, खिम्ति सहित सुनकोशी नदीको दोभानसम्म माछा मार्ने, नुहाउने, पौडी खेल्ने, लुगा धुने, वस्तुभाउ लैजाने, गिटीवालुवा निकाल्ने जस्ता कार्य नगर्न र नगराउन आयोजनाले सूचित गरेको छ ।