चरिकोट । दोलखामा मोटरसाईकल दुर्घट्ना हुँदा दुई युवकले ज्यान गुमाएका छन् । जिल्लाको भीमेश्वर नगरपालिका–६ रमिते डाँडास्थित सडकमा उक्त दुर्घट्ना भएको हो । दुई वटा मोटरसाईकल आपसमा ठोक्किएर भएको दुर्घट्नामा भीमेश्वर नगरपालिका–५ का २३ वर्षीय शिरिष बस्नेत र बैतेश्वर गाउँपालिका–३ का २५ वर्षीय सुजन दाहालको मृत्यु भएको छ ।
शिरिष गत स्ववियु निर्वाचनबाट गौरिशंकर बहुमुखी क्याम्पसका स्ववियु सभापति थिए । अर्का युवक सुजन चरिकोटको एक होटलमा सवारी चालकको रुपमा काम गर्दै आएका थिए ।
प्रहरीका अनुसार बा ५३ प ८८९९ नम्बरको मोटरसाइकल चढेर काठमाडौंबाट चरिकोटतर्फ आउँदै गर्दा उनीहरु बा.प्र. ०२–०३४ प ३२४२ नम्बरको अर्को मोटरसाइकलसँग ठोक्किएका थिए । मोटरसाइकल गएराति ९ बजेदेखि १० बजेको बिचमा ठोक्किएको प्रहरीको अनुमान छ ।
दुर्घटनामा गम्भीर घाइते भएका उनीहरुलाई उपचारका लागि च्छो रोल्पा अस्पताल चरिकोटमा पठाइएकोमा केही समयमै चिकित्सकले मृत घोषणा गरेका थिए ।
दुर्घटनामा ३२४२ नम्बरको मोटरसाइकल चालक बैतेश्वर गाउँपालिका–५ का २५ वर्षीय निर्मल खड्का सामान्य घाइते छन् । उनलाई प्रहरीले नियन्त्रणमा लिएर अनुसन्धान अघि बढाएको छ ।
