गोरखा । गोरखाको चुमनुब्री गाउँपालिका–६ वडाध्यक्ष विदेश पलायन भएका छन् । माओवादी केन्द्रबाट निर्वाचित वडाध्यक्ष सरोज लामा रोजगारीका लागि विदेशिएका हुन् । लामा २०७९ सालमा भएको स्थानीय तह निर्वाचनमा नेकपा माओवादी केन्द्रबाट निर्वाचित भएका थिए ।
पारिवारिक स्रोतका अनुसार वडा सदस्य ठिन्ले घ्याम्छो लामालाई कार्यवाहकको जिम्मेवारी दिएर उनी रोजगारीका लागि जर्मनी गएका हुन् । प्रमुख प्रशासकीय अधिकृत मनोज लामिछानेले पनि वडाध्यक्ष लामा स्वदेश नफर्किने भनेर विदेश गएको जानकारी पाएको बताए ।
वडाध्यक्ष लामाले सामाजिक सन्जालमा इमान्दारीपूर्वक काम गरेपनि जस नपाएकाले विदेशिएको उल्लेख गरेका छन् । उनले लेखेका छन्, ‘सकेसम्म सबैको चित्त बुझाउने गरी इमान्दारिताका साथ मेरो क्षमताले भ्याएसम्मको भूमिका र कार्य सम्पादन गरियो तर जति गर्दा पनि कहिले पनि जस नपाउने कामले आफूले गरेको कामबाट मलाई कहिले पनि आत्मसन्तुष्टि भएन । त्यसैले अबदेखि यो राजनीतिबाट सदाको लागि बिदा भएको निर्णयसहितको घोषणा गर्दै जिन्दगीलाई पुनस् एकपटक शून्य अर्थात जिरोबाट सुरुवात गर्न यो युवा पनि परदेश लागियो ।
