चरिकोट - ४५६ मेघावाट क्षमताको माथिल्लो तामाकोसी जलविद्युत आयोजनाको उद्घाटनको तयारी गरिएको छ । यही वैशाख मसान्तसम्म विद्युत उत्पादनको तयारीसंगै प्रधानमन्त्री केपी शर्मा ओलीबाट आयोजनाको उद्घाटन गर्ने तयारी भएको हो ।
आयोजनाको मुख्य सूरुङमा पानी खसाल्ने कामको बिहिवार शुभारम्भ गर्दै संचार तथा सूचना प्रविधि मन्त्री पार्वत गुरुङले केहीदिनभित्रै प्रधानमन्त्रीले आयोजनाको औपचारिक उद्घाटन गर्ने जानकारी दिए । मन्त्री गुरुङले सुरुङमा पानी हाल्ने काम शुभारम्भ गर्ने क्रममा नेपालको जलविद्युत क्षेत्रको इतिहासमा यो सबैभन्दा खुसीको क्षण भएको टिप्पणी गरे ।
आयोजना संचालनमा आउनु नेपाल राष्ट्र र नेपाली जनताको गौरबको विषय भएको उल्लेख गर्दै उनले तामाकोशी आयोजना मुलुक समृद्धिको लागि कोशेढुंगा हुने बताए । प्रधानमन्त्रीको मार्ग निर्देशन र उर्जामन्त्री टोपबहादुर रायमाझीले कुशल नेतृत्व तथा आयोजनाका पदाधिारी, कर्मचारी, मजदुरहरुको अथक मेहनतले यो सम्भव भएको भन्दै उनले सबैलाई धन्यवाद व्यक्त गरे ।
संचार तथा सूचना प्रविधि मन्त्री पार्वत गुरुङ र भौतिक पूर्वाधार तथा यातायात मन्त्री वसन्तकुमार नेबाङले पानी खसाल्ने कामको संयुक्त शुभारम्भ गरेका हुन् ।
प्रधानमन्त्री ओलीले एकसाताअघि काठमाण्डौंमा आयोजित एक कार्यक्रममा आयोजना निर्माणमा भएको ढिलासुस्तीप्रति असन्तुष्टि जनाउँदै अब मान्य नहुने चेतावनी दिएका थिए । । त्यसपछि आयोजनाका पदाधिकारी, कर्मचारी अहोरात्र खटेर बैशाख महिनाभित्रै विद्युत उत्पादन गर्ने तयारीमा जुटेका छन् ।
बहुप्रतिक्षित माथिल्लो तामाकोशी आयोजना स्वदेशी लगानीको हालसम्मकै सवैभन्दा ठूलो आयोजना हो । दुई मन्त्रीसहितको टोलीले माथिल्लो तामाकोसी जलविद्युत आयोजनाको गोंगरस्थित विद्युत गृह, जलाशय, बाँध, इन्टेक र अन्य संरचनाहरुको अवलोकन समेत गरेको छ ।
आयोजनाको सुरुङमा पानी खसाल्ने कार्यको शुभारम्भ उर्जामन्त्री टोपबहादुर रायमाझीले गर्ने तय भएको थियो । तर रायमाझीलाई कोरोना संक्रमण भएपछि अन्य दुई मन्त्रीले शुभारम्भ गरेका हुन् । मन्त्रीद्धयले चीन जोडने लामाबगर लप्ची सडकको सूरुङ मार्गको पनि स्थलगत निरीक्षण गरेका छन् ।
